Shqipëria është vendi me popullsi në moshë më të re në Europë, ku rreth një milion banorë janë fëmijë. Për të ndihmuar fëmijët dhe për të siguruar mbrojtjen e tyre në 27 shkurt të vitit 1992 shteti shqiptar ratifikoi Konventën e Kombeve të Bashkuara si një instrument i rëndësishëm për garantimin e të drejtave të fëmijëve në Shqipëri. Pavarësisht se nënshkrimi i këtij dokumenti nënkuptonte sigurimin  dhe garantimin e mbrojtjes së fëmijëve pa asnjë lloj dallimi, kjo nuk është arritur. Akoma në Shqipëri edhe pse 18 vjet mbas nënshkrimin të KDF kemi fëmijë të cilëve u privohet e drejta për të jetuar dhe gëzuar në një mjedis familjar, për të pasur një fëmijëri, për të shkruar në shkollë e mbi të gjitha për të pasur një identitet. Faktorë këto që kanë sjellë deri diku edhe vënien e fëmijëve në situatë vulnerabël, në situata abuzimi, dhune, shfrytëzimi e trafikimi.

Në vijim të konferencës së parë ndër-ministrore ku u pranua zyrtarisht problemi i trafikimit të fëmijëve si një nga format më të këqija të dhunimit të të drejtave të fëmijëve, OJF-të pjesëmarrëse në këtë konferencë vendosën të krijonin një koalicion me të njëjtin emër me atë të konferencës: “Së Bashku Kundër Trafikimit të Fëmijëve”.

Që prej Nëntorit 2001, këto OJF punuan mbi statutin e koalicionit. Përpjekjet e bëra u plotësuan më tej me themelimin e koalicionit më 2 Shtator 2002.

Koalicioni u regjistrua plotësisht ligjërisht dhe u njoh zyrtarisht nga autoritetet Shqiptare më 19 Shkurt 2003, në Gjykatën e Rrethit Tiranë, Vendim Nr. 535.

Gjatë viteve të tij të operimit si një koalicion i cili luftonte trafikimin e fëmijëve, fenomeni i trafikimit nuk mund të shikohej apo luftohej i ndarë nga procesi tërësor i mbrojtjes së fëmijëve. Për këtë arsye koalicioni është kthyer në një koalicion prej 25 organizatash të cilat advokojnë së bashku për mbrojtjen e të gjithë fëmijëve nga format më të ndryshme të dhunimit, abuzimit, neglizhimit, shfrytëzimit apo trafikimit.

Anëtarët e Koalicionit punojnë në fushën e mbrojtjes së të drejtave të fëmijëven  në drejtim të parandalimit, ofrimit të shërbimeve dhe integrimit të fëmijëve viktima të trafikimit. Anëtarët e BKTF veprojnë në këto zona: Tiranë, Elbasan, Durrës, Fier, Vlorë, Korçë, Kuçovë, Berat, Sarandë, Shkodër, Gjirokastër, Lezhë, Dibër, Kukës, Tropojë, Cërrik dhe Pogradec.

Vizioni  BKTF

Një shoqëri që respekton të drejtat e fëmijëve dhe është e përgjegjshme për mbrotjen dhe mirëqenien e tyre.

Një shoqëri në të cilën fëmijët janë të sigurtë dhe të mbrojtur.

Një shoqëri në të cilën fëmijët dëgjohen, kanë shpresa dhe mundësi.

Misioni i BKTF

Të advokojë dhe lobojë në emër të fëmijëve për mbrojtjen e tyre, nëpërmjet një sistemi funksional në Shqipëri.

Të edukojë shoqërinë për të njohur dhe respektuar fëmijët si qenie me vlera.

Të koordinojë dhe promovojë ndarjen e modeleve dhe praktikave më të mira në fushën e mbrojtjes së fëmijëve.